almost 5 years ago

講到香港人嘅優點,頭幾位不外乎係做嘢快、有效率、肯捱肯搏。
喺全球最有效率嘅城市入面,讀最高學府,過三爆四入癲list嘅天之驕子,當然亦都有齊晒上面嘅優點。
寫緊呢篇文嘅我,亦都係其中一份子。

凡事都講求效率嘅我,當然用咗同樣原則過我嘅大學生活。Undergrad三年,我就係用最短時間,用最少effort,去完成個degree。我當時嘅目標係,用最快速度讀post grad,26歲拎PhD然後喺大學教書,之後就不斷加人工,住洋樓飲洋酒 (no 我絕對唔會養番狗),每日返2個鐘工一直去到退休。

最高效率自學coursework

要實現呢個咁宏大嘅目標,第一步就係要完成個大學學位。

(好,講返效率) 如果你睇書夠快,上堂一定係低效率嘅活動。
假設你係知識分子,得閒會上吓TED聽吓talk嘅話,你會發現一個好嘅演講,1分鐘大概有160字。眾所周知港大用英文(English)教學,一轉台用英文,為咗遷就部份非英語學生或多或少速度都會打個7折,所以一個課堂可能只係得 100wpm (小弟打字都唔只呢個速度)。一堂兩節總共100分鐘,即係講足全場都係得10000字。10000字係 10-20分鐘可以讀完嘅份量。我何苦要搭一個鐘車來回,再坐兩個鐘,去聽一啲我用20分鐘可以學到嘅嘢?一個sem13堂,13 x 20min = 260min,即係話返兩堂嘅時間,我就可以自己學晒一個course嘅嘢。

只要你唔使返學,最緊要兩樣嘢就係寫paper同考試。

每個學期只讀三個星期書

每個學期大概會有10份paper,3個考試。以我當時嘅速度係最快幾個鐘,最慢10個鐘可以寫起1份paper (今日睇梗係覺得自己慢。寫2000字,facebook 一個上晝都唔止啦),1個考試就要20個鐘預備。本住「越近deadline越有效率嘅原則」,我每樣嘢都事必喺deadline前先至做。160個鐘 (= 20日 x 8hrs, 大概三個禮拜),就可以完成一個學期嘅所有assessment。

用圖去表達嘅話,大概係噉樣:

快,係咪就好世界?

如果要量化我學咗嘅內容。計吓我睇咗嘅書,讀過嘅journal,可能同其他大學生冇分別。有人可能搵份paper要坐喺圖書館搵幾個鐘,我就一個 scholar.google.com 2分鐘搵到,10分鐘睇完個abstract;英文唔好嘅話寫1000字可能要查字典,要起好多次稿,而我可能係構思咗之後就一氣呵成。

但係望到一班每日讀8個鐘書,或者因為唔識用電腦,英文唔好,種種原因而要幾個星期先至寫好一份paper嘅朋友,反而因為能力不足,唔可以一直衝死線,反而體會到時間有限,學識事先計劃,管理時間。但係我就因為每一樣嘢都做得好快,每一樣嘢都可以用好短時間完成,反而學唔識點樣將大嚿嘅嘢斬開做,唔識得點樣分先後次序。能力高、效率高,反而令到自己嘅大學學唔到應該學嘅嘢,十分諷刺。

大學其實好似一個田徑場。學生就係賽道上面嘅跑手。大學學位只係一場800米賽事,跑得快嘅人會贏;出到去外面,大家鬥嘅係邊個跑得遠。

Chrome 中文字 double click 斷字測試 →
 
comments powered by Disqus